Bideojokoek eragin onuragarria dute osasunean. Abilezia kognitiboak indartzeaz gain, estres postraumatikoa murrizteko ere lagungarri izan daitezke. Tresna horiek oso baliagarriak dira medikuntza edota hezkuntza bezalako eremuetan. Besteak beste, iktusa duten gaixoen egoera hobetzeko, bullying-a  prebenitzeko, eta gaixo gazteenei kimioterapiari aurre egiten laguntzeko erabil daitezke. 

Unai Díazek, Psikologian doktoratua eta Nesporako I+G+Bko ikertzaileak, jokalarien osasuna hobetzeko bereziki diseinatuak dauden 'serious games' jokoez gain, ohiko bideojokoek ere abantaila asko ekar ditzaketela azaldu du, Euskal Encounterren eskaini duen hitzaldian. Gerra  eta estrategiari buruzko jokoak edota lehen pertsonan diren tiroenak indarkeriarekin lotzen ditugun arren, Unai Díazek ziurtatu du “pertsona oldarkorrak izatera bultzatu baino jokalarien abilezia kognitiboak eta planifikatzeko gaitasuna hobetzeko” balio dutela.

Hizlariak joko zehatzen adibideak aipatu ditu; Tetris-ak, esaterako, jokalaria distraitu egiten du, eta, ondorioz, estres postraumatikoa murrizteko eta oroitzapen mingarrien errepikapena gutxitzeko gai da. Bestalde, abentura jokoak gaitasun espaziala hobetzeko lagungarri dira, eta gai militarrak lantzen dituztenek jokalariaren abilezi antolatzailea optimizatzen dute. Kontsola bideojokoei esker ere, "sasoi onean egon gaitezke; gure mugimenduak antzeman eta, horrela, jokalariari zenbait kirol egiteko aukera eskaintzen dio.  

Entretenimenduzko bideojokoek eskaintzen dituzten onura horiez gain, hizlariak joko hezigarri edo serious games izenekoen zerrenda aurkeztu du. Zerbitzuren bat emateko edo jokalarien osasuna hobetzeko helburuarekin egiten dira horiek, eta hezkuntza eta gizarte lanak egiteko erabiltzen dira, batik bat, medikuntza, hezkuntza eta buruko osasuna bezalako eremuetan. Badira haurrei jateko ohitura osasungarriak erakusten dizkietenak; ospitaleko giroa sortu eta medikuei operatzen erakusten dietenak; umeei kimioterapia tratamendua onartzen laguntzen dietenak, bullying-a prebenitzen dutenak; beldurrak, antsietatea eta depresioa kudeatzen laguntzen dutenak edota iktusa duten gaixoen errehabilitazioari ekiten diotenak mugimenduen sentsoreen eta Kinect teknologiaren bidez.

Díazek ez du bideojoko mota desberdinen arteko bereizketa nabarmenik egin nahi izan. Izan ere, entretenimendu nahiz heziketa jokoak dibertigarriak izan behar dira, haien diseinua jokalari motaren araberakoa izan behar du eta biak izan daitezke osasunarentzat onuragarriak. Era berean, hizlariak serious games deritzonak bideojoko tradizionaletatik oso ezberdinak ez izatea gomendatu du, batez ere umeei zuzenduta daudenean. Haiek askoz errazago sartuko dira jokoaren dinamikan, betiko bideojokoaren antzekoa denean eta landu nahi den gaia oso nabarmena ez denean.

Guillermo Herrera Hernandezek, berriz, ikasgeletan jokoen erabilerak dituen abantailak nabarmendu ditu: “interaktiboa denez, parte-hartzaileak erabaki eta kontrolatzen du egoera”. Oro har, hizlariak gogorarazi du “arbela aurrean egon baino” guztiok nahiago dugula “zerbait egiten ari garen bitartean ikasi”. Gainera, “aberasgarriagoa” dela ziurtatu du, erabiltzaileak egoera “bizitzen” eta “behatzen” duen bitartean ikasten duelako.

Hala nola Age of Empires edo Age of Mithology jokoak “zehatzak eta xehetasun handikoak” dira, eta Historiaren garai ezberdinak “era arinean” ikasteko aukera ematen du. Era berean, hizlariak bideojokoen erabilerak pertsona gisa hobetzeko ematen duen aukera azpimarratu du. Gatazka armatuetan bizirautea helburu duen This War of Mine jokoaren kasuan, “egoera zailetan jartzen zaitu eta zeure burua errealitate horretan irudikatzea lortzen du”, aipatu du Herrerak. Azken finean, “benetan existitzen den errealitate batekin harremanetan jarri eta beste pertsonen azalean jartzen eta enpatizatzen ikasten duzu”, erantsi du.